नेपालगञ्ज साउन ३० गते – बालमैत्री स्थानीय शासनका लागि नेपालगञ्जका वडा कार्यालयहरु सक्रिय बन्दै गएका छन् । नेपालगञ्ज उपमहानगरपालिका वडा नं १२ ले बाल मैत्री वडा घोषणाको बातावरण तयार गरिरहेका बेला वडा न २ ले पनि बाल मैत्री वडाका लागि पहलकदमी लिएको छ ।
बालमैत्री बातावरणका लागि वडा न २ ले आज बालमैत्री स्थानीय शासन बिषयक अभिमुखिकरण कार्यक्रम गरेको छ । सेभ द चिल्ड्रेन, बाँके यूनेस्को क्लवको सहयोगमा आयोजित कार्यक्रममा बालमैत्रीका लागि सरोकारवालाबीच साझा धारणा बनाउने प्रयास गरेको थियो । जनप्रतिनीधी, बाल क्लव प्रतिनीधी, शिक्षक, विद्यार्थी समेतको सहभागिता रहेको कार्यक्रममा वडा स्तरीय बालमैत्री स्थानीय शासन समिति पनि गठन गरिएको छ । वडा न २ का वडा अध्यक्ष सुनिलसिंह हमालको अध्यक्षतामा ११ सदस्यीय बालमैत्री स्थानीय शासन समिति गठन गरियो । नगर प्रमुख डा धवल शम्शेर राणाले बालमैत्री समाजका लागि सामुहिक पहलको खाँचो रहेको भन्दै वडास्तरमा भइरहेका पहलप्रति सहयोग रहने प्रतिवद्धता व्यक्त गर्नु भयो । उपमहानगरपालिकाका प्रमुख प्रशासकीय अधिकृत तोयनारायण सुवेदीले बालमैत्री शासन निर्माणमा सबै पक्षको सहकार्यात्मक भूमिका रहनु पर्ने आवश्यक्ता औल्याउनु भयो । वडा न १२ का अध्यक्ष बुद्धीसागर सुवेदीले बालबालिकासँगको सहकार्यमा मात्रै बालमैत्री वडा सम्भव हुने भन्दै सो बातावरण वडास्तरमा बनाइदिनु पर्ने सुझाव दिनु भयो । सेभ द चिल्ड्रनका विरेन्द्र थापाले बालमैत्री स्थानीय शासन, यसको अवधारणा, आवश्यक्ता, चरण, कानून लगायतका विषयमा प्रस्तुती गर्नु भएपछि खुला छलफल समेत गरिएको थियो । कार्यक्रममा वडाका २ वटा नेराप्रावि, नेरा आधारभुत विद्यालयलाई शैक्षिक सामाग्री पनि प्रदान गरिएको थियो ।