नेपालगञ्ज, चैत्र १३ गते– नेपालगञ्जमा भुकुम्प प्रतिरोधी भवन निर्माणको अभ्यास थालनी गरिएको छ । भुकम्प प्रतिरोधी प्रविधीयुक्त घर निर्माण गर्ने उदेश्यका साथ नेपालगन्ज उप–महानगरपालिकाले भूकम्प प्रबिधि राष्ट्रिय समाज नेपाल (एनसेट)को प्राविधिक सहयोगमा विभिन्न कार्यक्रम र अभियान समेत सञ्चालन गरिरहेको छ ।
अब बन्ने नयाँ घर÷भवन विल्डीङ कोड अनुसार नै बनाइनु पर्ने उपमहानगरापालिकाको आह्वान अनुसार विस्तारै भुकुम्प प्रतिरोधी घर, भवनहरु निर्माण भइरहेका छन् ।
सरकारी भवन अनीवार्य भुकुम्प प्रतिरोधी तय गरेको उपमहानगरपालिकाले पछिल्लो समय नीजी घर,भवन समेत भवन मापदण्ड आचारसहिंता अनुसार बनाउन पहलकदमी लिएको छ । एनसेटको सहयोगमा उपमहानगरपालिकाले घर÷भवनको ढाँचा, पिलर, विम, वाल निर्माण, सरिया जडान र सिमेन्टको प्रयोग लगायतका प्रविधि बारे घरधनी र निर्माण व्यवसायीलाई प्राविधिक सरसल्लाह दिदै आएको छ ।
उप–महानगरपालिकाका सिभिल इन्जिनियर सुरज शर्मा नेतृत्वको एक टोलीले नगरमा निर्माणाधिन केही घरहरुको स्थलगत अवलोकन (मोवाईल क्लीनिक) गरेको छ । घर धनी र ठेकेदारलाई भेटेर विल्डीङ कोड अनुसारको संरचना निर्माणमा प्राविधीक सरसल्लाह दिइएको एनसेटका इन्जिनियर बालकृष्ण लम्सालले जानकारी दिनु भयो ।
मोवाइल क्लीनिक लगायतको पहलले भवन मापदण्ड अनुसारका घर, भवन निर्माण हुनुका साथै जनधनको सुरक्षामा मद्यत पुग्ने विश्वास गरिएको छ । एनसेटसँगको सम्झौता अनुसार नेपालगञ्जमा डकर्मी तालिम, अभिमुखीकरण, नक्सा सर्वेक्षण लगायतका विविध कार्यक्रम गरिएका छन् ।